Inatsisartut Niuernermut Ataatsimiititaliaat 63.03.002.01 MAANI 202623 SiO, jbn 3. november 2000
Oqaluuserisassani immikkoortup UKA 2000/22, Imigassanik aalakoornartortalinnik nioqquteqarneq sassaallertarnerlu pillugit Inatsisartut inatsisissaattut siunnersuut, Inatsisartuni ukioq manna oktobarip ulluisa 31-anni aappassaaneerneqarneranut atatillugu Inatsisartut siunnersuutigaat misissorneqassasoq maleruagassiortoqarsinnaanersoq immikkut pisoqarnerani imigassanik aalakoornartortalinnik il.il. nioqquteqartarnermik sassaallertarnermillu kommunit Naalakkersuisut taarserlugit inerteqquteqarsinnaalernerannik kinguneqartussamik, tak. inatsisissatut siunnersuutip § 26-iani imm. 1.
Isumassarsiaq isumaga malillugu imigassaq pillugu inatsisip aqutsivigineqarnerata kommuninut tunniunneqarnissaanik Naalakkersuisut isumaannut naapertuuppoq.
Kisiannili siunnersuummut, pingaartumik inatsisilerineq eqqarsaatigalugu, atatillugu arlalinnik nangaassuteqarpunga.
Siullermik, taamatut oqartussaatitaanerup imaaliinnarlugu kommuninut tunniunneqarsinnaanerata pisinnaanera inatsisilerinikkut erseqqinngilaq. Tamatumunnga patsisaapput atortuulersitsinermut saqqummiussinermullu (nalunaarutiginninnermullu) tunngassuteqartut. Ilanngullugu eqqaamaneqassaaq inerteqqummik unioqqutitsineq pineqaatissiissutigineqarsinnaasariaqarmat tamatumanilu pisariaqarpoq pineqaatissiissutissat inatsimmik tunngaveqarnissaat.
Saqqummiussinermut (nalunaarutiginninnermut) tunngatillugu inerteqqutip qaqugu atortuulernissaata qanorlu sivisutigisumik atuunnissaata, suup inerteqqutigineqarnerata aammalu inerteqqummik unioqqutitsinermut pineqaatississutaasinnaasut innuttaasunut erseqqissumik nalunaarutigineqarsinnaanissaat qularnaarneqartariaqarput.
Ilanngullugit isumaliutigineqartariaqarput qanoq akulikitsigisumik inerteqqutiginnittoqarsinnaassanersoq, inerteqqut kommunimut tamarmut aamma/imaluunniit ilaannaanut atuutissanersoq kiisalu aalajangiinissamut tunngavissat aalajangersimasuunissaat qularnaartariaqarluni.
Matumani ajornartorsiut kommunit ileqqoreqqusaat pillugit ajornartorsiutinut naapertuuppoq. Taakku eqqarsaatigalugit ajornartorsiut aaqqinneqarpoq kommunip ileqqoreqqusaliaa inatsit naalagaaffimmut tamarmut atuuttoq tunngavigalugu ileqqoreqqusaliaappat taassuma Naalagaaffiup Sinniisaanit atortussanngortinneqartarneratigut, ileqqoreqqusaliaq namminersornerullutik oqartussat inatsisiliaannik tunngaveqarpat kommunip ileqqoreqqusaliaa naalakkersuisunut ilaasortamit susassaqartumit atortussanngortinneqartarluni.
Paasisimasat takutippaat kommunit ileqqoreqqusaliaasa atortuulersinniarneqartarnerisa kigaatsuinnarmik pisarnera, pissutigalugu piffissamik atuisoqartarmat oqaasertalersugaanerata iluarsaanneqarneranut atortuulersitsinerullu pinnginnerani kommunalbestyrelsip atortuulersitsinissamullu oqartussaasup akornanni attaveqatigiittarnermut.
Immikkut pisoqartillugu imigassanik aalakoornartortalinnik nioqquteqartarnerup sassaallertarnerullu unitsinneqarnera kissaatigineqartutut sunniuteqassappat piaartumillu pissappat ullumikkut aaqqissuussineq imaappoq kommunalbestyrelsip piumasaqaateqarneratigut matusineq pillugu nalunaarummik Naalakkersuisut saqqummiussisarlutik.
Kiisalu isumaqarpunga nunatsinni kommunit, taamatut aaqqissuussisoqarnerani aqutsisussan-ngortinneqartartut, maleruagassap pileriartornerani peqataasariaqartut imaluunniit minnerpaamik tusarniaavigineqartariaqartut.
Inatsisartut Inatsiseqarnermut Ataatsimiititaliaata tusarniaanernut akissuteqarnissamut piffissaliussaa malillugu inatsisissatut siunnersuutip pingajussaaneerneqarnissaa sioqqullugu nunatsinni kommuninut tusarniaanissaq pisinnaanngimmat aammalu inatsisissatut siunnersuutip siullermeerneqarneranili suleqatigiissitaliamik, inatsimmut ullunut nalitsinnut naleqqunnerusumut siunnersuusiortussamik, pilersitsinissaq Naalakkersuisut ilimasaarutigereermassuk imigassanik aalakoornartortalinnik nioqquteqartarnerup sassaallertarnerullu inerteqqutiginissaanut kommunit pisinnaatitaalersinnaanissaat pillugu apeqqut suleqatigiissitaliami tassani oqaluuserineqassasoq siunnersuutigissavara.
Tamatumuuna qularnaarneqassaaq siunnersuummut atatillugu apeqqutit sukumiisumik isumaliutigineqarnissaat ilaatigullu KANUKOKA periarfissinneqassalluni siunnersuummik nalilersuinissamut.
Isumaliutersuutikka Niuernermut Ataatsimiititaliap aamma Inatsisartut isumaqatigippatigit apeqqutit tamakku suleqatigiissitaliami oqaluuserineqarnissaat qularnaassavara.
Inussiarnersumik inuulluaqqusillunga
Simon Olsen